ಬೇಡ ಬೇಡ ನಮಗೆ ಕನ್ನಡ ಬೇಡ

ಭಾರಿಸು ಕನ್ನಡ ಡಿಂಡಿಮವಾ
ಓ ಕರ್ನಾಟಕ ಹೃದಯ ಶಿವಾ

ಶಿವ ಶಿವಾ... ಈ ಡಂಗುರ ಕೇಳಿ ಕೇಳಿ ಮನಸು ಕಂಗಾಲಾಗಿದೆ. ಈ ಡಂಗುರ ಕೇಳುವ ಅಲ್ಪಸಂಖ್ಯಾತರಲ್ಲಿ ನಾನೂ ಒಬ್ಬನಿರುವುದರಿಂದ 'ಅಲ್ಪ'ಸಂಖ್ಯಾತ ಸಹಜ ಭೀತಿ ನನ್ನನ್ನಾವರಿಸುತ್ತದೆ. ಈ 'ವಿಷಾಲಯ' ಹೃದಯದಲ್ಲಿ ಕನ್ನಡಕ್ಕೆ ಸ್ಥಾನ ಕೊಟ್ಟರೆ ಅದಕ್ಕೆ ವಿಷಪ್ರಾಶನ ಮಾಡಿ ಕೊಲೆ ಮಾಡಿದಂತಾಗುತ್ತದೆ ಎಂಬ 'ಅಲ್ಪ' ಭೀತಿ ಎದುರಾಗಿ ಹೃದಯದಿಂದ ಕನ್ನಡವನ್ನು ಕಿತ್ತುಹಾಕಬೇಕೆಂದಿದ್ದೇನೆ. ನನ್ನ ಹೃದಯದಿಂದಷ್ಟೇ ಅಲ್ಲ ವಿಷಾನಿಲಯ ಕನ್ನಡಿಗರೆಲ್ಲರ ಹೃದಯಕ್ಕೆ 'ಕನ್ನ' ಹಾಕಿ ಕನ್ನಡವನ್ನು ಮುಕ್ತಗೊಳಿಸಬೇಕೆಂದಿದ್ದೇನೆ.

ಕನ್ನಡ ಡಿಂಡಿಮ ಕೇಳಿ ಕೇಳಿ ಕಿವಿ ಕಿವುಡಾಗಿ ಬೆಪ್ಪು 'ಬೆರಣಿ'ಗಣ್ಣು ತೇಲಿಸುತ್ತಿದ್ದಾಗ, 'ಆಂಗ್ಲ' ದಂಡ ಹಿಡಿದು 'ಸಾಫ್ಟ್' ಆಗಿ ಮೇಲೇರಿದ 'ಕನ್ನ'ಡ ಮಿತ್ರರು ನನ್ನ ಕಾಲರ್ ಹಿಡಿದೆಳೆದು ಪಿಂಡ ದಂಡ ಎಂದೆಲ್ಲಾ 'ಹಾರ್ಡ್' ಆಗಿ ಕೊರೆದು ತಲೆ ತೂತು ಮಾಡುವುದರಲ್ಲಿದ್ದರು. ಅಷ್ಟರಲ್ಲಿ 'ಎಚ್ಚರ'ಗೊಂಡೆ. ಸರಿ, ನಾನೂ ಮೇಲೇರಬೇಕು, ಆಂಜನೇಯನಂತೆ ಸೀಮೋಲಂಘನ ಮಾಡಬೇಕೆಂದು ನಿರ್ಧರಿಸಿ 'ಹಾರ್ಡ್' ಆಗಿ ಪ್ರಯತ್ನಿಸಿ ನೋಡಿದೆ. ಹೂಂ...ಹೂಂ... ಬಿಲ್ ಕುಲ ನಿನಗೆ ಸಾಧ್ಯವಿಲ್ಲ ಎಂದು ಕಪಾಳ ಮೋಕ್ಷದ ಏಟು ನೀಡಿ ಸೀಮೆ ಬಿಟ್ಟೇ ಓಡಿಸಿದರು. ಕೆನ್ನೆ ಊದಿಸಿಕೊಂಡ ಆಂಜನೇಯನಾದೆ.

ಕರ್ನಾಟಕದಲ್ಲಿ ಉಸಿರಾಡಲು ಕನ್ನಡ ದೇವತೆಗೇ ಕಷ್ಟವಾಗಿರುವಾಗ ಆಕೆಯ ಉಸಿರು ನಂಬಿ ಬದುಕುತ್ತಿರುವ ನನ್ನಂತಹ ಬಡಪಾಯಿ ಕತೆ ಏನಾಗಬೇಕು? ಬೇಡವೇ ಬೇಡ ಕನ್ನಡ ಎಂದು ಭಂಡ ಧೈರ್ಯ ಮಾಡಿ ಆಂಗ್ಲ ದೇವತೆಯ ಒಲಿಸಿಕೊಳ್ಳಲು ಇದ್ದಬದ್ದ ವ್ರತ ಮಾಡಲು ನಿರ್ಧರಿಸಿದೆ. ಮನಸಿನಲ್ಲಿ ಕನ್ನಡ ದೇವತೆಯನ್ನು ಇರಿಸಿಕೊಂಡು ನನ್ನ ಪೂಜಿಸುತ್ತಿರುವೆಯಾ ಎಂದು ಆ ಆಂಗ್ಲ ದೇವತೆ ಮತ್ಸರದಿಂದ ನನಗೆ ಶಾಪವಿತ್ತಳೋ ಏನೋ ನನ್ನ ವ್ರತವೆಲ್ಲಾ ವ್ಯರ್ಥವಾದವು.

ನನಗಂತೂ ಆ ದೇವತೆ ಒಲಿಯಲಿಲ್ಲ. ನನ್ನ ಕೆಳ ತಲೆಮಾರಿನವರು ಈ ರೀತಿಯ ಬಾಧೆ ಅನುಭವಿಸಬಾರದೆಂದು ದೃಢನಿಶ್ಚಯ ಮಾಡಿದ್ದೇನೆ. ಇಂದಿನ ಜಾಗತೀಕರಣದಲ್ಲಿ ಇಂಗ್ಲೀಷ್ ನಮಗೆ ಅನ್ನದಾತೆ. ಹಸಿದುಹೋಗಿರುವ ನಮಗೆ ಅನ್ನದಾತೆಯೇ ಮುಖ್ಯ. ಊಟಕ್ಕಿಲ್ಲದ ಉಪ್ಪಿನಕಾಯಿ ಇದ್ದರೆಷ್ಟು ಬಿಟ್ಟರೆಷ್ಟು.

ಮನೆಯಲ್ಲಿಯಾಗಲೀ ಅಥವಾ ಶಾಲೆಯಲ್ಲಿಯಾಗಲೀ ಇಂಗ್ಲೀಷ್ ಮಾತನಾಡುವಿಕೆಗೆ ಪ್ರೋತ್ಸಾಹವಿರಬೇಕು. ಇಲ್ಲದಿದ್ದರೆ ನಮಗೆ ಇಂಗ್ಲೀಷ್ ಸರಿಯಾಗಿ ಸಿದ್ಧಿಸದು. ಕೊಡಗಿನ ಎಷ್ಟೋ ಮನೆಗಳಲ್ಲಿ ಇಂಗ್ಲೀಷ್ ಇಂದು ಮನೆಮಾತಾಗಿರುವಂತೆಯೇ ಕರ್ನಾಟಕದ ಪ್ರತೀ ಮನೆಗಳಲ್ಲೂ (ಗ್ರಾಮಗಳೂ ಸೇರಿ) ಇಂಗ್ಲೀಷ್ ನೆಲೆಸಬೇಕು. 'ಹೊಟ್ಟೆಗೆ ಇಲ್ಲದಿದ್ದರೂ ಜುಟ್ಟಿಗೆ ಮಲ್ಲಿಗೆ ಹೂವೇಕೆ?' ಎಂಬ ಸಾಕ್ಷಾತ್ಕಾರದಂತೆ ನಮ್ಮ ಹೊಟ್ಟೆಗೆ ಅನ್ನ ನೀಡುವ ಇಂಗ್ಲೀಷ್ ಅನ್ನು ಮಾತ್ರವೇ ಬಳಸೋಣ. ಸಾಧ್ಯವಾದರೆ, ಸಮಯವಿದ್ದರೆ, ವ್ಯವದಾನವಿದ್ದರೆ ಕನ್ನಡ ನೋಡೋಣ.

ಪ್ರಪಂಚದ ಹಲವಾರು ಭಾಷೆಗಳು ಈಗಾಗಲೇ ಜನರ ನಾಲಗೆಯಿಂದ ತಪ್ಪಿಸಿಕೊಂಡು ಮುಕ್ತವಾಗಿವೆ. ಆ ಮುಕ್ತವಾಹಿನಿಗೆ ಕನ್ನಡವನ್ನೂ ಸೇರಿಸಿ ಕೃತಾರ್ಥರಾಗೋಣ. ಬನ್ನಿ ಎಲ್ಲರೂ ಬನ್ನಿ ನನ್ನೊಂದಿಗೆ ಕೈಜೋಡಿಸಿ. ಕರ್ನಾಟಕದ(ಅಥವಾ ಭಾರತದ) ಪ್ರತೀ ವ್ಯಕಿಯ ಮನೆಮಾತು ಇಂಗ್ಲೀಷ್ ಆಗುವುದರತ್ತ ಆಂಗ್ಲಾಂದೋಲನ ನಡೆಸೋಣ,... ಕನ್ನಡವನ್ನು ಮುಕ್ತಗೊಳಿಸೋಣ....